سؤال محرج للبنات؟؟؟

[الوايليه]

قلنا بنااات صج ملقوف:))))
السلام عليكم ....

لو مثلا انتي كنتي طفشااااانه :( ونايمه الظهر ويوم صحيتي لقيتي اهلك صاحين وجالسين يتغدوون قمتي جلستي معهم وانتي واصلة معك
الا امك تناظرك وتضحك وتتبسم وانتي كل شوي تعدلين بشكلك تحسين فيكي شي غلط ( وحده ماهي واثقه في نفسها ) ويوم خلص ابوك من الغداء وقام هو واخوانك
التفتت عليكي امك وقالت لك :مبرووووك يابنيتي
انتي : مبروووك على ايش (طفشانه ومالك خلق )
امك : اليوم كلمتني حرمه تبيك
طبعا راح تتغير ملامح وجهك ويروح الطفش ويصير وجهك مايحتاج بشوش بس بتستحين من امك وبتخلين وجهك خجول وبتقولين
انتي : وش تبي الحرمة (انواع الاستهبال):p
امك : تبيك تكنسين حوشهم وش تبي يعني تصور مع خشتك ( الام خفيفة دم )
انتي : يعني تبي تخطبني (بريئة مرة ):o
امك : ايه وش قلتي
انتي : ماابغى اعرس (مسوية قوية وماهمك)
امك : طيب برسله لبنت خالك ( حشا صاااار ايميل مو ولد ) :eek:
انتي : ياحليلك يمه تراني امزح على طول تصدقين
المهم بعد يومين دقت ام المعرس
ام المعرس : الووووو (متحمسة) وولدها جنبها
امك : الوووووو
ام المعرس : وشلونكم
امك : طيبين
شكلي بطولها المهم بوصلكم للزبدة (صارت مكرونه بالباشميل ) ماعلينا المهم
ام المعرس : وش قلتوااااااا
امك : موافقين
ام المعرس : اجل ترى يوم الخميس بيجي ولدنا يشوووف بنتكم
امك : اوكي ( عادي امك متطورة )
المهم خلصوووووو وانتي بدا قلبك يقول طربق طربق طربق اليوم الاثنين ويوم الخميس قريب

سؤااااااااالي هنا ابغى اعرف وش بتسوين من يوم الاثنين للخميس ويوم الخميس بالذااااات وش بتسوووووين ؟؟؟؟؟؟؟


قولوا لي وش بتسوون؟؟؟:confused:

[]دمعـه]

يحليلج حدج مهتمه أقول روحي نامي وقعدي باجر ونزلي من غير ماتغسلين حتى أقصاه حشره ماره:)

[الوايليه]

يبا مو صج .......خيال خيال......عالعموم وجهة نظر احترمها ونشوف خواتنا شنو بسووون عالاقل يمكن يغسلون اول ما يقعدون من النوم:) شاكره مرورج

[أم عبدالرحمن]

يلا يا بنات جاوبوا على السؤال ؟

شتسوون ؟

[الوايليه]

الظاهر يام عبدالرحمن انحرجو البنات.....صرنا الخميس والمعرس وصل وما قالو شبسوون:).....شاكره مشاركتج

[عهد الاشواق]

لا لا انا بقول شبسوي.. يعني شراح نسوي اكيد اول شي نروح السوق ونشتري احلى بدلة وبعدين نكشخ حييل واكيد راح نكون متوقعين ان بنطلع حلوين بس الي راح ايصير ان ماراح انام ونظل نتخيل ونفكر بهاليوم لين تنتفخ عيننا وما نطلع حلوين .....

[Petro_Geo]

المفروض الوحدة تستخير و تدعي ربها اذا هذا الانسان اللي يسعدها فانشاء
الله يتم النصيب و ان كان يشقيها تدعي ان الله يبعده عنها .......وتتصرف طبيعي

[حور]

مساء الخير

لاتذكرونا .....
والله أنا عن نفسي راح احاول اسنع بعمري كثر مااقدر , والله إني أحمد ربي إنا احنا صرنا فى زمن الواحد يتفاهم بنفسه مع زوجتة ويختاره زين .........

وراح زمن امسح واربح وانتي وحظج "

وبعدين انا وحده بما اني احب اتخيل واروح بحلام ورديه عل مدار الساعه كله اتخيله ماكو مثله اهم شي مزيون (الله يديم النعمة ) وطويل ( ماعليه ) وابيضاني ( كحلي) وحلجة وردي ( بنفسجي غامج ") وعريض المنكبين (عصل مع كرشه ") وعنده أم عيون (فورد موديل 94) وريحته عطور وبخور (يعشق بودرة بيبي جونسون ), يحب الكشخه والماركات (كله يتكلم عن السراديب ) ويحب السفر للدول الأوربيه ( يعشق الصمان مع امه بس ) يحب يتكلم فى السياسية ( يموت فى انتخابات جمعيتهم) ,,,,,


ماودي اكمل أخاف تظحكون على سوالفي ............


حور

[Geo_Q8]

هههههههههههههههههههه

حووووووووور والله موتيني من الضحك الله يسامحج بس حرام عليج شباب هاليومين مو كلهم جذي

بعدين انا بعلق على كلامج أختي الفاضله

الجمال وهالأمور كلها عطايا الله يعني يمكن يكون مو جميل لكن ذرب وأنيق وهذا هو الشي المهم .

أما سالفه الفورد ترى الفقر مو عيب ولاحرام ويازين الرجال اللي ما يتضاهر وهو ماعنده الا الفلس :)

وأخيرا شفيها اذا راح الصمان مع أمه يمكن موديها عند خواله ومايبي يتعبج معاه

تحياتي أختي حور بس كلامج والله صج ونسني

[سر الود]

لووووووووووووووووووووووووووووووووول
والله اول مره اقرى الموضوع وفصلت من الضحك على الردود:)

يحليلج عهد الاشواق حدج صريحه وبترو جيو هذا احسن شي صلاة الاستخاره مهمه لانج توكلين امرج لرب العالمين واللي الله كاتبه بيصير اما حور فانتي مبدعه حدج :) دايما الخيال شي والواقع شي ثاني مختلف تماما واهم شي الوحده تدعي ربها انه يكون صالح وعقب عاد ايي شكله وطوله وكشخته وسكبته وانا معاج ان الله جميل يحب الجمال :)

[Mr.abooooood]

لووووووووووووووووووووووووووووووووووووووووووووووووو ول

والله صج سوال محرج

انزين عهد لو عقب كل هذا التعب والمصاريف المعرس هون شنو بتسوين


حور ما يملئ عيني ابن آدم إلا التراب :)

[عهد الاشواق]

خخخخخخخخخخخ شنو عبود اهو ياي يشتري سياره خووو ههههههههههههههههههههههههه بس لازم اعرف اذا قصدك بعد ماشافني ولاقبل لووول

اذا قبل ماشافني اقول احسن الله فكني منه لانه امبين انه مو قد كلمته ياخي انطر شوفني بعدين جذب وقول في شي موعاجبك :)) << لوووووول

واذا بعد ماشافني عاد ايحصله وحده مثلي خخخخخخخخ لا والله بس الصج ان الزواج قسمه ونصيب واكييد بيكون هذا نصيبي وشي عادي بس عاد اذا كان عاجبني أقعد افكر بس النسيان بعد نعمه يعني انساه وعادي خوو موعايشين قصه حب لووووووووووووووول واذا العكس اقول الحمدلله :))

وعن المصاريف ماعليه كله من جيب ابوي لووول مودافعه شي من عندي عشان اتحسف ههههخخخخخخخخخخخخخخخ

[حور]

مساء الخير

سيد /عبوووود , أنا ابتديت مع الشكل ولم انتهي من باقى المواصفات ومهو عيب لو أطلب على الأقل واحد يفتح النفس ....كيفي ومن حقي ,,

وبعدين اخذها مني.......نصيحه .. كلهم كلهم كلهم عيوب من فوقهم الى تحتهم .. عشان جذي اقول واحد مزيون وعنده خير ولاواحد جيكر وبصاص..

وبعدين اخي جيو كويت , الفقر موعيب لكن البخل عيب؟؟ لمايكون بحسابه فوق العشرين الف يجمعهم على قلبه ولايشتري سياره هذا العيب؟؟

وبعدين والله اهم شي تتزوجون واحد مو مستواكم العلمي ولاالمالي هذيلي يترقعووون أهم شي المستوى الفكري؟؟؟

بتقولون يعني شنو ؟؟

والله سمعوا نصيحيتي / الوحده ولا الواحد لازم تقعد معاه وتدرس شخصيته , وتدرس ظروفه ومحيط عائلته عدل , وتشوف هل الأفكار متطابقة حدا ما؟؟

كلهم رايحين فيها على الأقل حاولي تطلعين من زواجج بأقل الخساير الممكنه..لأنج من اول ماتتزوجين اعرفي انج تركتي مملكه كنتي عايشه فيها بنعيم .................................................. ....عند ابوج..



حور

[سر الود]

يحليلج يا حور حدج ماخذه فكره سيئة عن الريايل لكن اصابع ايدج مو سوا في منهم معدنهم ذهب صحيح انهم قله لكن تفائلي :)

[miss_geo]

لوووووووووووووووووووووووووول يحليلج يا عهد الاشواق والله ضحكتيني ، صراحتج تونس

حور انا معاج ان الشكل والمال مهمين ، مثل ما الريال يدور البنت الحلوه او المقبوله ، البنات لهم حق يطلبون شخص مزيون او مقبول على الاقل ، والرسول صلى الله عليه وسلم لما راحت له امرأه تشكي قبح زوجها وانها ما تبيه، شرط عليها ترد له المهر(كان قطعة ارض على ما اعتقد) فقط ! يعني مافيها شي لما الوحده تطلب شخص وسيم وعنده خير وهذا كله من باب التخطيط للمستقبل خصوصا ان كل شي صار غالي بهالوقت ولازم الوحده تظمن شخص يكفل لها معيشة ما تقل عن عيشتها عند اهلها ، وان قلت ، ما تقل وايد :)

عالعموم، كل شي قسمه ونصيب ، ولو تجري جري الوحوش غير رزقك ما تحوش

الله يعينا بس على الكرشه والصلعه والا الباجي يهوووون :p

نسيت اقول مشكووووووره عزيزتي الوايليه والله القصه تفطس ضحك حدها اوووكي (خصوصا الام خفيفة دم)

[عهد الاشواق]

حور أنا معاج بس هم مثل ماقالت سر الود اصابعج مو سوى وان خليت خربت :)

واذا على ان البنت قاعده ابيت ابوها ملك شي اكيد وقاعده بجنه بعد يعني دلال وكمال والي تبي عندها :))

ومحد ايحاجيها كيفها << بس مو اوفر يعني لوووووول اكيد الوحده ماتلقى احسن من بيت ابوها